“sirin.az” xəbər verir ki, bu barədə Azərbaycan Uşaqlar Birliyinin sədri Kəmalə Ağazadə paylaşım edib. O qeyd edib ki, sığınacaqda fərdi təhsilə getməli olan 3 uşağın yerdəyişməsinin edilməməsindən narazıdır. 

K. Ağazadə bildirib ki, avqust ayından bəri aidiyyəti qurumlar yerdəyişməni edə bilmirlər: “Noyabrın 14-də bununla bağlı paylaşım etmişdim. 17-si dedilər ki, həftənin 1-ci günündən artıq gedəcəklər. Hər gün paltarını axşamdan hazırlayıb bizdən cavab gözləyirdi. 16 yaşlı 3-cü sinfə fərdi təhsil üçün hazırlaşan qızımız depresiv vəziyyətdədir artıq! Kəsib doğrayıb paltarlarını...”

Məsələ ilə bağlı Bakı Şəhər Təhsil İdarəsinə sorğu ünvanladıq.

Bundan sonra Kəmalə Ağazadə problemin həll olunması ilə bağlı yeni paylaşım edərək bildirib ki, onunla BŞTİ-nin sektor müdiri Bəşarət Məmmədov əlaqə saxlayıb: “Məlumat üçün bildirirəm ki, iş saatı başlayan kimi mənə Bakı Şəhəri üzrə Təhsil İdarəsinin əməkdaşı Bəşarət müəllim zəng edərək bildirdi ki, müraciətimizlə bağlı qərar və tapşırıq artıq 314 nömrəli tam orta ümumtəhsil məktəbinin direktoru Səfa müəllimə verildi. 3 uşaq 1 dekabr 2025-ci il tarixdən müvafiq cədvələ uyğun olaraq fərdi təhsilə gedəcək”.

Qeyd edək ki, fərdi təhsilə ümumi təhsilə ümumiyyətlə cəlb olunmayanlar, ibtidai təhsil səviyyəsini bitirdikdən sonra təhsildən kənarda qalanlar, ibtidai təhsil səviyyəsinin IV, ümumi orta təhsil səviyyəsinin IX sinifləri istisna edilməklə, bu səviyyələr üzrə digər hər hansı bir sinfi bitirdikdən sonra təhsildən kənarda qalanlar cəlb olunurlar.  

Fidan Etibar