Çin yeni nəsil yüksək sürətli qatar texnologiyasında növbəti böyük addımı atıb. Yerli istehsal olunan və “Diriliş” mənasını verən “Fuşing” (CR450) qatar seriyası dünya sürət rekordu qıraraq gələcəyin dəmir yolu nəqliyyatında ön sıralara çıxıb.

“sirin.az” “Science and Technology Daily”yə istinadən xəbər verir ki, Şanxay–Çinqdu yüksək sürətli xətti üzərində keçirilən sınaqlar zamanı iki CR450 seriyalı qatar yan-yana keçərək ümumilikdə 896 km/saat sürət əldə edib.

Bu, dünyada iki yüksək sürətli qatarın eyni anda belə bir sürətə çatdığı ilk hadisə kimi qeydə alınıb.

Hər iki qatardan biri təkbaşına 0-dan 350 km/saat sürətə 4 dəqiqə 40 saniyəyə çataraq maksimal 453 km/saat sürət göstəricisi nümayiş etdirib.

“Fuşing” seriyasının yeni nəsil modeli olan CR450 qatarlarının 2026-cı ildə kommersiya istifadəsinə verilməsi planlaşdırılır. Onun maksimal texniki sürəti 450 km/saat, əməliyyat (kommersiya) sürəti isə 400 km/saat olacaq.

Hazırda bu modelin real xəttlər üzərində 600.000 km-lik sınaq yürüşlərini uğurla başa vurması gözlənilir. Artıq 2023-cü ildə, Fujian əyalətindəki Meykou Körfəz Körpüsündə aparılan ilkin sınaqlarda CR450 453 km/saat sürətə çatmağı bacarmışdı.

Yeni qatarın istismara verilməsi ilə hazırda 4 saatdan çox vaxt alan Pekin–Şanxay marşrutu 2,5 saata qədər enəcək. Bu, təkcə vaxt baxımından deyil, həm də enerji səmərəliliyi və sərnişin rahatlığı baxımından böyük irəliləyiş sayılır.

Çin hazırda 50.000 km-ə yaxın yüksək sürətli dəmir yolu şəbəkəsinə malikdir ki, bu da dünyadakı ümumi şəbəkənin 70 faizini təşkil edir. Ölkə 2030-cu ilə qədər bu şəbəkəni 60.000 km-ə çatdırmağı qarşısına məqsəd qoyub.

Bu infrastruktur genişlənməsi yalnız nəqliyyat sahəsində deyil, həm də Çinin texnoloji üstünlüyünü və innovasiya potensialını nümayiş etdirən strateji addım kimi qiymətləndirilir.